طريقة عمل نجرسكو
لعشاق المكرونات والباشملات ومدمرى الريجيم
المكونات
٥٠٠ جرام مكرونة اسباجتي مسلوقة نص سوا
الحشو
صدر فرخة متقطع مكعبات
٤ ثمرات فلفل الوان
ماشروم
زيتون أسود مخلى
البشاميل
كيلو ونص لبن حليب
٧ملاعق كبار دقيق منخول
7ملاعق زبدة
٢ مكعب مرقة خضار
الطريقة
أولا تجهير الحشو
- فى طاسة نضع فيها معلقتين زيت وبعد ما يسخن كويس ابدأ أضيف مكعبات الفراخ ونشوحها لحد ماتاخد اللون الابيض
- نضيف فلفل أسمر ورشة من جوزة الطيب
- نضيف شرائح الماشروم ونشوحها مع مكعبات الفراخ ١٠ دقائق
- نضيف الفلفل و الزيتون ونقلبهم مع بعض ونطفى النار مباشرة و نظبط الملح
- كده عندنا الحشو جاهز
ثانيا تجهيز البشاميل
- فى حلة على النار نضع الزبدة وبعد ما تسيح تماما نضيف الدقيق ونقلبه فى السمن كويس لغاية ما لونه يفتح ويستوى
- أضيف اللبن بالتدريج مع الاستمرار فى التقليب بالمضرب اليدوى
- نضيف مكعبين المرقة ونستمر فى التقليب
- نظبط الملح والفلفل الأسمر على حسب الرغبة
- بعد الحصول على قوام مناسب نطفى النار ونضيف معلقتين كبار قشطة بلدى أو جبنة كيري ونقلب بالمضرب
- وبس كده البشاميل بالطريقة دى طعمه خرافى
عندنا دلوقتى المكرونة والحشو و البشاميل جاهزين
نجيب صينية نضع فى الأرضية بشاميل
بعد كده طبقة مكرونة ونحط عليها معلقتين بشاميل
نحط الحشوة
طبقة مكرونة كمان
ونغرق الوش بباقى البشاميل
ثالثا التسوية
ندخل الصنيه فرن مسبق التسخين شغال من تحت بس
بعد ما تاخد لون من جوانب نخرجها نحط الجبن ونشغل الشواية يادوب الجبن تسيح
جربوها وادعولى
بألف هنا
تعليقات: 0
إرسال تعليق